fbpx

英超Fantasy – 從戰術上解構阿仙奴FPL嘅選擇

TEXT:波仔@HKFPL

今次呢篇其實都係想滿足下除咗寫FPL之外,可以寫多少少關於我愛隊阿仙奴嘅戰術分析同FPL嘅選擇,希望阿迷或者非阿迷睇完呢個post,都會幫到你哋手去揀阿仙奴嘅球員。

炒咗阿迪達佢?

首先第一點,我自己仲係好信任阿迪達嘅,所以如果大家係想見我大肆批評或者叫阿迪達落台嘅阿迷,就可能會失望啦。睇咗廿幾年阿仙奴,見證佢哋由盛轉衰,近十年由後雲加時代,到艾馬利再到阿迪達,其實隊波嘅防守能力同做波能力都係有進步嘅。睇返今季尤其係下半季嘅曼聯,其實有啲3年前阿仙奴嘅影子。防守場場都有犯錯,後防球員成為箭靶,龍門屢救險球。進攻方面主要都係靠1至2位有質素嘅主力擔起隊波,今季嘅般奴、C朗就尤如之前嘅奧燒、山齊士,冇乜走位、戰術可言,俾無限嘅自由度佢哋搞,有態嘅就carry, 冇態嘅就進攻全方位啞火。所以見到阿仙奴防守叫做比較organise,特別防守死球有一手,而進攻方面更加有返少少行雲流水嘅感覺,其實都有啲恩惠,啲進攻走位同迫搶明顯有調教過。

艾蘭尼 vs 盧干加

講講阿仙奴去到季尾都應該會用一個4-2-3-1嘅陣式,由沙卡同艾蘭尼為雙中場雙pivot嘅陣容,有好有唔好。對住車路士同曼聯都贏波而回,艾蘭尼俾阿迷讚到天上有哋下無。艾蘭尼嘅作用,尤其喺對住high press嘅車路士特別顯著,佢嘅優點係ball control 好,short pass唔錯,閱讀球賽能力同大局觀都比盧干加好。所以要佢喺車路士嘅high pres下,用半秒時間去搵到隊友,揀個啱嘅option,再execute個傳波,對佢黎講冇乜難度,做好基本野自然會製造到空位俾阿仙奴去攻,而playmaker嘅角色亦都唔需要靠佢。對曼嗰場就踢得仲舒服,喺中間20分鐘曼聯迫搶踢得辛苦少少,大致上上半場同下半場未段都係控制以內,曼聯啲遮線同防守企位幾鬆散,好易就搵到half-space嘅奧迪哥特同尼基迪亞。不過對住low block嘅球隊可能唔同講法,冇足夠嘅創造力嘅佢可能只能不停駁腳橫傳搵空位。

而盧干加打中場中個侵略性會大少少,如果開綠燈俾佢攻,佢做到持球突破再分波,但係大局觀較弱,一俾人press會慌,因為唔夠時間抬頭搵隊友,變相會出現醫院波,wrong decision,交落死位,甚至死去嘅情況。

後場嘅危機同契機

無咗泰亞尼同冨安建洋兩個正選左右閘,要靠泰華利斯同蘇亞利斯,對於善用兩邊空位嘅阿迪達會有一定嘅影響,而兩位本身防守嘅能力都相當有限,所以做成兩閘攻不銳,守不穩嘅情況。隨住冨安出返黎,相信右路嘅防守能力會有所改進,但係有泰華利斯就會有變數,加上左中堅嘅加比爾有時防守唔集中,都係一個失波嘅危機。

彈完都要讚下,當贏緊波阿迪達會換入賀定打3中堅陣死守。呢個low block嘅3中堅陣,係其中一個我覺得非常成功嘅一大陣式。就算得返20至30%嘅持球率,防守嘅緊密度同discipline就算強隊都好難撕破,兩邊出波3中堅唔會輸蝕,而中間又密到冇空位搓入去,仲要偶爾靠快翼做到反擊。以前贏緊1球最尾10分鐘㩒爆平安鐘嘅情景同經歷希望已成過去。

中前場嘅配合

拿卡嘅失寵,反而睇到阿迪達對戰術嘅調整。唔使講都知拿卡嘅弱點係做完支點,佢冇足夠嘅速度衝入禁區去完成攻勢。雖然拿卡嘅入球數字絕不亮麗,但都係有佢喺戰術上一定嘅作用,drop back做支點support,引對方中堅跟出黎對位,再將個攻勢放俾兩翼做focal attacking points,所以搭住拿卡嘅會係侵略性較強嘅馬天尼利同薩卡,而入波嘅多數係呢兩點同趕得切後上嘅攻中奧迪哥特。呢兩周用返尼基迪亞,佢link up play同post up play相對較弱,所以阿迪達用返史密夫路爾打左翼,要嘅係佢嘅視野同造波能力,中間幫到奧迪哥特手,分擔playmaker嘅工作。而尼基迪亞都專注做好前線嘅領軍人物,做好走位同入楔嘅時機,隊友自然會搵到佢。

賽程前瞻

阿仙奴得返5場聯賽,GW35作客韋斯咸,DGW36對列斯聯同熱刺,GW37對紐卡素,GW38對愛華頓。唔好計「讓四」大賽同崩盤先,睇戰術同Match up,韋斯咸、列斯聯同愛華頓算係favourable match up。韋斯咸多遜領紅,無晒中堅用,再夾喺兩場歐霸中間,嗰場阿仙奴要贏。列斯聯唔會死守, 都應該啱阿仙奴踢。愛華頓可能已經降班,或者又搶分,未必想守攞1分。唯一係擅長穩守突擊嘅熱刺有機恰到阿仙奴雙閘,而紐卡素係比較守得少少。所以我相信只要唔輸熱刺,阿仙奴頭四都仲有一個唔細嘅機會嘅。

FPL角度

如果薩卡嘅傷無大礙,佢一定係首選。尤其拿卡不在陣,12碼會由佢處理。其次係5.4m嘅尼基迪亞,有中前場嘅support,佢每場點都會有2至3個機會架啦,而佢踢英格蘭青年軍同阿仙奴青年軍嘅入球率都絕對唔惹少,季尾完約又要踢好波表現自己,build up信心季尾有機會爆發。後防方面我嘅推介可能會令大家跌眼鏡。如果真係要入阿仙奴後衛,首推4.3m嘅炸彈泰華利斯。唔係貪佢平,既然失波就齊齊無clean sheet,點解唔揀個進攻力最好嘅泰華利斯呢?之前試過沙卡打左閘,結果左邊又死,中路又死,所以冇咗泰亞尼,泰華利斯會係必然左閘。大家有所不知,佢press con都有講過,佢最強嘅進攻武器係佢隻私家右cue,cut in再用右腳射死角,我就覺得佢會喺季尾5場入多一至兩球波。

Advertisements

IG:hk.fpl

FB : HK 英超 Fantasy – HKFPL

YouTube : HK英超Fantasy HKFPL

Advertisements