fbpx

英超Fantasy 英超都有Double Double?

TEXT: 波仔@HKFPL

嗱,玩FPL嘅領隊要留意啦!因為之前有唔少比賽都因為各種原因延期,而英國疫情問題亦日趨嚴重。喺啱啱個禮拜一英超賽會開咗一次會,到底對嚟緊賽程會有啲咩影響?而傳說中嘅「Double Game Week」終於有機會喺GW21同GW22出現,形成連續兩個禮拜嘅「Double Game Week」。即係有啲球隊會喺GW21同GW22正常哋每周踢一場波,而有啲球隊可能喺嗰兩個禮拜內踢4場波,自不然攞嘅分數都會高分啲!咁有邊啲球隊會有機會有「Double Game Week」呢,又有邊啲球員值得入?我哋同你逐一分析。

追賽程

事源點解會有「Double Game Week」嘅發生,就係因為喺之前幾周都有唔少比賽因為天氣同疫情關係要延期,當中熱刺同般尼更加比其他球隊踢少3場,所以賽會都要特別安排返補賽。而喺FPL入面,過咗嘅Game Week就已經過咗,好似第13周嘅熱刺對般尼,如果第時有補賽,FPL係唔會將嗰場嘅分數計返去第13周,反而係會計落佢踢嗰個禮拜,當佢哋有兩場波咁計分。所以針對返哩啲「Double Game Week」球隊部署係攞高分嘅關鍵。

英超賽會開會

喺禮拜一,英超賽會同二十隊嘅代表開完會,大家都關注到底會唔會短暫停咗英超,但係絕大部分嘅球隊都希望比賽繼續。所以之後嘅GW19、GW20同GW21都會成事,針對返編排賽程嘅問題,佢哋都有討論到要追賽程就可能要喺英格蘭嘅本土盃賽入手。而嚟緊嘅周中都已經排滿曬,GW21同GW22中間本來將會舉行聯賽盃4強嘅第一回合(1月4日)同第2回合(1月11日),而1月8日就係足總盃第3圈。GW22嘅周中已經預留咗時間踢第三圈嘅補賽(1月18日)。

而為咗令英超追返進度,賽會商討緊將聯賽盃4強變一回合制,而足總盃和波不設補賽直射12碼,令到GW21同GW22嘅周中都可以安排英超嘅補賽。所以就解釋到點解有啲球隊好似曼聯就有機會喺GW21同GW22都有「Double Game Week」。

賽程最新安排

帶個頭盔先,英超賽會暫時係仲未決定到嚟緊嘅賽程安排,大家都係純粹推測一下。而賽程同疫情哩家野真係可以話變就變,所以大家跟進返我哋HKFPL IG嘅最新資訊。最後講講,GW22一定會係一個比較大型嘅「Double Game Week」,有機會有8至14隊波踢兩場波。而淨返嘅fixture可能會落咗喺GW21。下圖見到嘅賽程就係其中一個預測,見到有7隊波會喺未來兩周踢4場,而有8隊波會踢3場。

Advertisements

值得留意賽程:

曼聯

  • GW19 vs 紐卡素
  • GW20 vs 般尼
  • GW21 vs 狼隊 + 白禮頓*
  • GW22 vs 阿士東維拉 + 賓福特*

*未落實

曼聯係其中一隊賽程最好嘅球隊,6場都唔係對top 6。但係就要諗下邊個球員有機會踢得晒6場,C朗同般奴費南迪斯都係可以諗嘅選擇,尤其沙拿準備好踢非洲盃。蘭歷克執教咗兩場,兩場都零封對手,所以後防球員例如迪基亞都可作考慮。

熱刺

  • GW19 vs 水晶宮
  • GW20 vs 修咸頓
  • GW21 vs 屈福特 + 李斯特城*
  • GW22 vs 阿仙奴 + 白禮頓*

*未落實

熱刺上場熱血咁逼和咗強隊利物浦,其實好彩啲哈利簡尼生性啲,真係贏埋都唔出奇。哈利簡尼同孫興民哩對前場組合終於復甦,上場一人入一粒,而兩個都錯失咗不下一次嘅黃金機會,對返啲弱啲嘅對手,係咪可以乘勝追擊呢?

屈福特

  • GW19 vs 狼隊
  • GW20 vs 韋斯咸
  • GW21 vs 熱刺 + 般尼*
  • GW22 vs 紐卡素 + 水晶宮*

*未落實

屈福特同般尼係唯一兩隊有機會喺GW21有「Triple Game Week」嘅球隊,所以都要部署下,前場就梗係祖舒亞京治同艾曼紐丹尼斯, 點都要執返一個架啦。

車路士

  • GW19 vs 維拉
  • GW20 vs 白禮頓
  • GW21 vs 利物浦
  • GW22 vs 曼城 + 阿仙奴*
  • GW23 vs 熱刺
  • GW24 輪空 (世界冠軍球會盃)
  • GW25 輪空 (世界冠軍球會盃)

*未落實

相反, 車路士球員就可以慢慢offload。嚟緊可能得GW21同GW22可能得3場比賽, 仲要場場硬仗,加上GW24同GW25都因為世冠盃所以冇英超踢,所以冇乜野都唔再入車仔球員。

最後總結, 因為賽程都仲係未定到,而疫情又越嚟越嚴重,所以都係建議如果做轉會,都係要留到最尾一刻deadline前先做,以免重蹈屈堅斯嘅覆轍。亦記住要留意 HKFPL嘅IG最新資訊,我哋一有賽程嘅消息都會同大家公佈!

IG:hk.fpl

FB : HK 英超 Fantasy – HKFPL

YouTube : HK英超Fantasy HKFPL

Advertisements