TEXT：波仔@HKFPL
每隊波都要有貴價球員，所以揀中高分嘅平價球員可能更加緊要！喺4蚊同4.5蚊嘅球員當中，都不乏正選嘅球員可以留意下。
Neco Williams (£4.0m, 28.1%)
尼高威廉斯係4蚊後衛中最穩陣嘅選擇。打3中堅陣式嘅森林，佢司職正選嘅右翼衛。上季季中外借富咸，14場2入波2助攻。而今季佢都要喺聯賽爭取表現，去鞏固自己喺威爾斯國家隊嘅正選席位。
Nathan Patterson (£4.0m, TSB 2.8%)
柏達臣上季季中喺流浪加盟愛華頓，花咗半年時間終於搵到正選上陣嘅機會。同樣屬於出擊型嘅右翼衛，佢嘅競爭對手高文受傷，將會缺陣季初賽事，所以佢將會喺頭幾周出任正選。
Andreas Pereira (£4.5m, 25.2%)
彭利拿今季由曼聯轉投富咸，喺熱身賽最尾3場均屬打正選攻中10號位，仲會開埋角球，熱身賽已交出2個助攻，佢會係最穩陣嘅4.5中場。富咸前場4人長遠會係米杜域、沙洛文、彭利拿同傷咗嘅哈利威爾遜，攻力唔會太弱。
Josh Dasilva (£4.5m, TSB: 1.1%)
賓福特上季踢得唔錯，艾歷臣決定唔續約，佢個位置會由贊臣同安耶卡或者達施華頂上。如果對弱隊，可能會選用創造能力靠強嘅達施華。賓福特賽程都唔錯，可以諗諗達施華。
Sean Longstaff (£4.5m, TSB: 1.2%)
紐卡素係呢幾隊入面牌面最強嘅球隊，但都有個4.5中場，唔係7.5%嘅梅菲，係1.2%嘅朗史達夫。中場中最穩陣嘅係般奴基馬利斯同祖艾寧頓，而第3個會係朗史達夫或者韋洛克。不過要留意下，紐記傾緊入麥迪臣，可能會影響對朗史達夫出場嘅機會。
