TEXT：樽仔@HKFPL
首先要多謝足球周刊嘅邀請，可以多一個渠道同大家分享Fantasy Premier League嘅樂趣。
我哋喺嚟自HKFPL，一個本地製作有關英超經理人及相關Fantasy遊戲內容嘅團隊，目前主要喺IG、YouTube同Facebook可以搵到我哋，而我哋喺每個星期五晚，都會喺Youtube Channel開LIVE同咁多位FPL經理人交流心得。
踏入12月
好快咁總結返過去少少現象，GW9至12係「Premium Defenders」嘅爆發時期，如果你係有列斯占士、芝維爾、阿歷山大阿諾特、簡些路喺陣中，相信你已經感受到Clean Sheet加助攻、入球，再加上Bonus Points嘅威力，對你嘅FPL得分進程有莫大幫助。但嚟到GW13至15，車路士、曼城連續3場無Clean Sheet， 大家又可能懷疑人生。
踏入12月，第一個GW就係GW15（12月4日），然後GW16（12月9日）同埋GW17（12月17日），呢段就係12月內6個GW嘅前半段。寫稿時正正經歷GW15第2個match day，亦想借機會連結返少少之前寫過嘅主題，就係「Stay or Out」。
車路士同曼城兩隊過往嘅失球都唔多, 但呢幾周令大家一地眼鏡碎，咁到底信定唔信，啲球員「Stay or Out」呢？咁就要睇返個原因。列斯占士、芝維爾、馬高斯阿朗素呢幾個球員之所以可以壓到咁上，中場中嘅組合係相當關鍵，但佢地喺FPL嘅得分其實唔太高，例如簡迪、佐真奴、高華錫等等，最近因為傷患問題，要轉用羅夫度斯卓克、沙奧尼古斯，效果實在係強差人意，（詳細嘅戰術分析應該有其他專頁會寫），簡單嘅結論係，簡迪、佐真奴、高華錫喺杜曹車仔體系發揮十分關鍵。個情況就變得相當有趣，通常玩FPL，你都係會留意一啲得分高嘅球員，但車仔嘅攻守轉換核心，喺FPL得分並唔高，但因為佢哋嘅受傷，直接拉低咗車仔後防嘅FPL得分（主要係無咗Clean Sheet）。
而曼城無Clean Sheet嘅情況就比較簡單三個字「唔好彩」。對韋斯咸費蘭甸奴送大禮，俾蘭仙尼整球世界波。對屈福特俾靴南迪斯射完中柱再射，無得救。可見體系上並未見有太大問題。所以如果係「Stay or Out」，要考慮嘅，我會先諗係體系問題，定係單一失波。
而球員嘅FPL得分，大家都可以試下用多一個角度去睇，理解球隊打法同球員喺球隊內嘅定位再決定。當然仲有就係有無啲球員雖然FPL無分，但其實都係球隊嘅核心，從而影響FPL揀球員嘅策略。
12月，1個月內有6個FPL嘅Gameweek，一有傷患，就會錯過咗一大段比賽期，大家要小心部署。
