TEXT： 波仔 @HKFPL
先講講嚟緊嘅賽程，GW21話到俾我哋知，幾好嘅計劃都係冇用，一爆疫又隨時波都冇得踢，有唔少領隊做足準備，睇準機會入卡維特利雲同迪馬雷格雷，諗住針對愛華頓GW21同GW22嘅「Double Game Week」，點知4場變兩場，仲要射失12碼，好掃興！
所以我輕輕帶過嚟緊GW22同GW23嘅「Potential Double Game Weeks」，跟住講啲有趣啲嘅題目。嚟緊GW22分別有8隊波踢兩場，新增嘅4場波分別係賓福特主場對曼聯，李斯特城主場對熱刺，般尼主場對屈福特，白禮頓主場對車路士。而踢完GW23將會直接入國際賽期，但係一返黎2月5號個禮拜就係足總盃第4圈。因為維拉、列斯聯同般尼都喺第3圈輸波，英超賽會有機會將維拉對列斯聯，或者維拉對般尼擺喺嗰日同其他足總盃賽程一齊踢，所以GW23 有機會成為一個橫跨國際賽期嘅「Double Game Week」。
最尾想講一講，喺FPL歷史上單周一場波最高分嘅球員當然係沙拿，喺17/18球季贏屈福特5：0當中，入咗4球同一個助攻，攞咗29分。而喺一周雙賽嘅賽程中，朗尼試過兩場波攞32分（20分＋12分），而近代少少就有哈利卡尼16/17年嘅31分。
咁歷史上攞過最低分嘅球員呢，大家又記得幾多個？排緊世界第4嘅youtuber FPL Focal整合咗個歷史以黎單周最低分嘅球員。
修咸頓嘅中堅碧拿歷克喺上季輸俾曼聯0：9嘅比賽入面擺烏龍同食紅牌，最尾-7分，嗰周偏偏有一個領隊「Triple Captain」咗佢，扣咗歷史新高嘅21分。同樣哋修咸頓輸0：9都係有前科，19/20輸俾李城0：9，嗰場就係貝查特攞紅再失9球，扣咗6分。
後衛扣分其實唔係咁出奇，因為失波係會扣分，史篤城中場禾達斯喺12/13球季，喺冇食黃牌紅牌嘅情況下，-4分先驚為天人。主場對車路士嘅賽事，2個烏龍球扣4分，加上補時階段射失12碼再扣2分，踢足90所以最尾埋單扣4分。
Twitter credits：@FPL Focal
