TEXT：樽仔@HKFPL
話說英超賽會喺香港時間嘅12月15日，即係GW17 matchday 1之後，宣佈李斯特城對熱刺唔會因為隊內爆發疫情而為賽事延期。當時李斯特城領隊羅渣士表示十分失望，而新上任嘅熱刺領隊干地，其實亦都希望賽會可以延期，令佢地有機會踢返上周踢唔到嘅歐洲賽。
而正正喺GW17嘅Match day 2，有一場波喺開波前嘅兩小時被「call-off」，呢場就係般尼對屈福特，當然賽會都係有帶頭盔咁話係「Case by case basis」。
以上嘅事都係12月16日上午發生嘅事，但就在寫緊呢篇稿期間，即當日晚上，事情已經180度轉變。
李斯特城對熱刺正式延期，成個GW，最終只有7場波踢左。最尾兩場的車路士對愛華頓，紐卡素的利物浦，兩場比賽都傳有球員中招。幸好兩場波都能夠順利進行，只係有部份球員如雲迪克、法賓奴和居迪斯鍾斯，在開賽前1小時宣佈中招而缺陣。
而GW18嘅第一場， 曼聯對白禮頓，喺GW17未完，已經因為曼聯復操再爆疫而率先宣佈取消。及後英超賽會再陸續宣佈修咸頓主場對賓福特、屈福特主場對水晶宮、韋斯咸主場對諾域治以及愛華頓主場對李斯特城嘅賽事，都不能如期上演，即GW18暫時只有5場波踢，隨時仲有賽事取消。
根據ESPN嘅最新報導，英超甚至有機會停賽直至2022年1月8日再開。
經歷咗一個極唔完整，咁多突發嘅GW17，FPL喺呢兩周運氣佔嘅比率大幅上升，除非你有預知能力，或者係超強運氣，如果唔係都好難全身而退。
為公眾、球員健康，以至FPL遊戲嘅角度出發，賽會如果係停一段時間，未嘗唔係一個合理嘅安排。雖然香港呢刻疫情唔會稱得上為嚴重，但都在此祝大家身體健康， Stay Safe！
