TEXT：樽仔@HKFPL
嚟到最後階段，好多球隊嘅戰意都開始唔明朗，早幾周就講咗球隊嘅賽程，今周同大家分返幾個梯隊，結合返賽程，做返最後階段嘅部署啦。
爭到頭崩額裂嘅，當然係曼城同利物浦，而家榜首爭奪只差1分，有Budget嘅領隊，拎返住迪布尼、沙拿、簡些路、阿歷山大阿諾應該都會有得分保證。
歐洲賽席位爭奪同樣激烈，由第3位嘅車仔，數到第8位嘅狼隊，各有各目標。但車仔仲有個足總盃可以爭，聯賽有機會適時留力，不過有DGW墊住，都要入返1至2個球員。阿仙奴受傷患困擾，不過陣中主力沙卡都可以考慮，最近都有output。曼聯競爭力相對都係弱，但C朗嚟料都Hat Trick，要入都係揀佢，不過太貴，我自己就唔考慮。熱刺我自己就最睇好，干地係好有級數嘅教練，哈尼卡尼、孫興慜、古路施夫斯基嘅三叉戟都有威脅，干地要保前四嚟證明自己，比較可靠。狼隊應該都會比較盡力完成賽季，相反韋斯咸就應該全力打歐洲賽，聯賽未必再係focus。
再數落去李城情況同韋斯咸相似，但有幾個DGW喺手，都可以考慮。白禮頓、紐卡素、賓福特、修咸頓、水晶宮、維拉，都可以叫做踢緊風流波，唔建議太集中資源。
護級方便有兩個梯隊：諾域治、屈福特都算係有心無力，列斯聯就相對安全但都唔可以咁老定，預到好賽程嘅都可以留意一下。淨低果兩隊係愛華頓同般尼，真係難兄難弟，係鬥無咁差咁解，愛華頓叫好少少，起碼叫有好啲嘅進攻點，不過兩隊都係少掂為妙。
同大家就分享完我現階段嘅睇法，英超就入最後直路，同時DSE都開考，借呢個機會同各位考DSE嘅朋友仔打打氣，希望大家都拎到應得嘅成績！
