TEXT： 波仔 @HKFPL
最近有報導話港女睇完男友踢波想分手，因為男友踢後衛冇波入冇上進心。GW22話你知，其實都唔一定架！過咗大半個GW22，一定令到唔少人好唔滿意，尤其係cap咗丹尼斯或者C朗嘅朋友，證明踢前鋒都唔係好可靠。屈福特熱刺無端端由「Double Game Week」變返「Single Game Week」，阿仙奴又冇波踢，反而幾個貴價後衛就保持住穩定嘅輸出，祖奧簡斯路同阿歷山大阿諾特又有雙位數字嘅得分，各自攞咗10分同11分，而復甦嘅羅拔臣更加攞咗12分。
阿歷山大阿諾特同祖奧簡斯路今季已經攞咗142同132分，只係僅次於攞咗177分嘅外星人沙拿，排第2同第3位。如果呢幾周冇阿諾特同簡斯路，都應該輸到好頭痕。阿諾特唔覺唔覺已經上到去今季近高嘅8.4蚊，雖然比起後衛歷史高位泰利嘅9蚊仲有一小段距離，但係貴都要入。阿諾特喺18/19球季創下單季後衛13個助攻嘅紀錄，攞咗185分，隨即俾19/20年嘅阿諾特破咗紀錄，創下單季15個助攻而攞到210分嘅紀錄。而今季嘅阿諾特踢咗半季已經貢獻咗10個助攻，僅次於12個助攻嘅保雲。
而呢邊相7蚊嘅簡斯路都係唔錯嘅選擇，喺曼城嘅輪換體系當中，少有地喺22場比賽踢咗21場波，攞咗1個入波8個助攻。黎緊對住修咸頓，賓福特同諾域治，有望可增添更多分數！
而今季頭10名最高分嘅球員，只有安東尼奧一個前鋒，排第9。所以男友可以大大聲好自豪咁同女朋友講，踢前鋒好叻咩？我係踢後衛架！
IG：hk.fpl
FB ： HK 英超 Fantasy – HKFPL
YouTube ： HK英超Fantasy HKFPL
Advertisements
