GW37係今季最後嘅一個double game week。曼城差一場就奪冠，當然想喺主場球迷面前大炒車仔慶祝。曼聯今週嘅double會對般尼茅夫同車仔，隨著福仔傷愈復出，會唔會係冷門嘅隊長人選？白禮頓對住已降班嘅修咸頓同有機會已篤定冠軍嘅曼城，會唔會有意外嘅收穫？
1. Captain係咪都係夏蘭特？
夏蘭特一定會係最多人 cap嘅選擇，亦係最正路嘅選擇，曼城強攻車仔爭冠， 夏蘭特要繼續入波破紀錄，一定唔會留力。如果要追rank嘅就可能要考慮cap下其他人選，福仔同般奴嘅double game week都係唔錯嘅選擇。
2. 曼城輪換風險下，邊個中場最穩陣？
答案係冇。要睇穿哥帥，基本上係冇乜可能，仲要估晒兩場真係難上加難。每個中場都有輪換嘅風險，特別係如果贏咗車仔要留力踢歐聯決賽。
3. 出唔出紐卡素同利記球員？
給收咗艾斯杜邊恩嘅教訓，有double都係盡量出double先，但係淨返嘅單賽週球員，都係以阿仙奴，紐卡素同利物浦較易踢。個人傾向進攻球員先過防守球員，尤其係維拉同李城都有入波嘅potential。
4. 賣沙拿入般奴或其他雙賽球員？
雖然般奴今週double，沙拿得一場， 唔好唔記得利記煞科戰會對住修咸頓， 沙拿隨時係GW38 captain嘅大船，所以要計埋哩一點先做轉會呀。
