終於等到deadline前嘅最後一日，曼城、曼聯、熱刺同水晶宮喺GW20將會有 double game week，而曼城已confirmed喺GW23會有另一個double，所以陣中持有3個曼城球員極為緊要，除咗中前場嘅KDB同夏蘭特較穩陣外，要揀到穩定出場時間嘅曼城後衛可謂難上加難，到底HKFPL會點樣分析品評曼城後場嘅選擇呢？
Ederson（£5.4m）TSB: 13.5%
最穩陣嘅出場時間一定係艾達臣，不過作為控球主導賽事嘅曼城，龍門嘅save points一定相對低，bonus分亦都唔會多，所以得分嘅ceiling有限。
Cancelo（£7.2m）TSB 46.2%
聯賽盃正選出場踢足90分鐘，而陣中嘅隊友都係後備球員，所以估計GW20頭場曼市打比正選出場嘅機會相對低，喺Ake同Rico Lewis踢得咁好嘅情況下， 輪換風險較大，總括黎講唔值£7.2m，可考慮賣出套現，加強中前場嘅實力。
Walker（£4.8m）TSB 4.1%
獲加亦係聯賽盃正選嘅球員，所以之後聯賽正選上陣嘅機會唔高，但曼城右閘位始終要防曼聯福仔同熱刺嘅老孫，若果哥帥未完全100%盡信Lewis嘅防守能力，都有機會出返獲加打右閘，但始終有極大輪換風險，應要避免買入獲加。
Stones（£5.4m）TSB 2.7%
史東斯本來係其中一個最值得推介嘅後衛，但上場聯賽盃因有微傷而缺席大軍名單，變相有個細細嘅感嘆號。已持有嘅，可以觀望一下先，而未持有嘅，呢刻反而唔太建議入，除非有進一步嘅傷患消息。
Laporte（£5.7m）TSB 0.5%
拿樸迪喺世盃返黎後嘅3場聯賽都未有出場，而踢足之後嘅兩場盃賽賽事，證明佢已退居成為球隊嘅第3甚至第4中堅。不建議入。
Rico Lewis（£3.9m）TSB 0.6%
其中一位今季冒起嘅奇兵，而哥帥更加對佢讚不絕口。到底可唔可以坐正個右閘位，暫時仲係未知之數。但哥帥對曼聯賽前表露咗有瘋狂嘅想法，到底會唔會係繼續信任路易斯去看管如日方中嘅福仔呢？如果要壓cost，佢會係一個唔錯嘅選擇，但係右閘位始終都有同獲加甚至簡些路有輪換嘅風險，冇足夠嘅信心喺兩個double game week都可以踢曬兩場波，所以冇錢而想入曼城後衛可考慮 Lewis，但資金充裕少少可考慮以下兩位選擇。
Nathan Ake（£5.0m）TSB 1.4%
哥帥除咗點名讚路易斯，仲有讚埋尼敦艾基防守力強同進攻聰明。佢個左閘位都算相對穩陣，競爭對手Sergio Gomez實力明顯次一等，加上佢可以司職左閘或中堅，所以出場時間又更加穩陣。雖然轉型之後xG90同xA90數字分別由上年嘅0.13同0.06，大跌到今年嘅0.02同0.02，但佢絕對係曼城double可考慮嘅後防選擇。
Manuel Akanji（£5.0m）1.8%
今季喺多蒙特轉投曼城嘅艾簡治受益於曼城後防嘅傷兵潮，續漸坐穩正選嘅中堅位。喺拿樸迪不受重用，迪亞斯同史東斯嘅受傷下，佢將會係曼城最穩陣出場嘅正選中堅，而佢狀態都係一流。再講佢今季嘅進攻數據，xG90達到0.06， 係艾基嘅3倍，但當迪亞斯同史東斯康復後，佢出場嘅時間有可能會有稍微嘅調整。所以最尾都係推介返有爆分potential嘅艾簡治同埋出場時間感覺上最穩陣嘅尼敦艾基。
