Text：波仔@HKFPL
喺過去嗰個禮拜，FPL網站入面球員嘅資料欄，多咗xG、xA、xGI同xGC，4項數據。今日最主要講下expected goals (xG)，究竟佢哋點計出黎，同埋點樣幫我哋喺FPL入面揀球員。
要比較前鋒邊個勁啲，最簡單當然係睇入球數目同射門數字，夏蘭特22場入咗26球，簡尼23場入咗17球，而東尼20場入咗14球，但係就咁睇入球數字未必有足夠嘅資料去證明一個前鋒嘅強弱。打個比喻，如果夏蘭特射咗70球先入26球，而東尼射咗20球就入14球，咁就已經唔同講法。場均射門數字都可以顯示到前鋒嘅活躍程度，一個相對重要嘅因素去選擇FPL嘅進攻球員，但係當球員A同B，兩個數據一樣，都係場均3球射波，球員A全部6碼嘅一對一近射，而球員B全部都係30碼遠射，大家都會知道球員A入波嘅機率會大啲。
正正係咁嘅緣故，近黎興起嘅一個數據叫 xG (expected goals)。xG就係會睇每球射波嘅入波機率，每球射波均會得出一個0 – 1中間嘅數字，越接近0就越難入，越接近1就越易入，佢考慮到射波嘅位置，觸球嘅部位，之前傳球嘅方法等等，但球員嘅個人能力就不作考慮之列。咁係咪越高越好呢？又未必係。用夏蘭特做例子，xG：17.63，即係正常情況預計佢入17至18球，但佢入咗26球，得出個結論就係佢overperform咗佢應該入球嘅數字。FPL嘅角度，其實兩睇，可以證明佢比一般球員嘅finishing好，但亦都可以interpret做佢嘅數據未必可以sustain到，而佢喺正常情況下個入球率都好有機會drop off。相反紐尼斯xG：8.43，但入得5球，無可否認佢finishing係差啲，但跟據機率正常少少或者好運少少已經可以入多幾球。
長遠啲咁睇，季季都over-perform嘅球員，表表者一定係孫興民，由16/17開始季季入球都超過 xG，上季xG為16.99但入咗23球，呢類球員可以歸納為 finishing好好嘅球員，不過今季跌晒watt，其實都只係同xG睇齊，暫時xG：4.9，入咗4球，所以佢都只係由finishing嘅達人回歸正常人。
最後xG都係有兩個盲點嘅，第一，佢計埋十二碼，一般12碼個xG係大概0.77 – 0.78咁上下，其實用npxG (non penalty xG)會更加反映到球場上嘅表現。第二，因為淨係計射門，有時候有啲big chance好似單刀咁，俾後衛封到冇起腳就唔會計落xG個數到，所以最後都要靠eye test親眼睇波作個人分析。
